|
BRUTAL NA PAGPASLANG SA MILITANTENG LIDER KABABAIHAN KINONDENA NG GABRIELA
by GABRIELA
Saturday, Aug. 28, 2004 at 3:33 PM
gab_pid@tri-isys.com 3712302 #35 Sct. Delgado St. Bgy. Laging Handa QC
Si Melita Trinidad Carvajal ay municipal coordinator ng Gabriela Women's Partylist sa Sta. Rosa Laguna at tagapagsalita ng mga maralitang taga-komunidad ng Sta. Rosa laban sa demolisyon. Siya ay pinaslang kahapon, Biyernes ng umaga sa mismong harapan ng kanyang bahay ng dalawang hindi pa nakikilalang salarin. Si Carvajal ay isa lamang sa mahigit kumulang 80 na biktima ng pagpaslang at paglabag sa karapatang pantao sa rehiyon ng Timog Katagalugan.
NEWS RELEASE
28 August 2004
For Reference: EMMI DE JESUS, Secretary General (0917-3221203)
GABRIELA Public Information Department 3712302/3743451
BRUTAL NA PAGPASLANG SA MILITANTENG LIDER KABABAIHAN KINONDENA NG GABRIELA
Mariing kinondena ng militanteng grupo ng kababaihang GABRIELA ngayon ang ginawang pagpaslang kay Melita Trinidad Carvajal, municipal coordinator ng Gabriela Women’s Partylist (GWP) at kumandidatong konsehal sa bayan ng Sta. Rosa Laguna. Si Carvajal, 50 anyos, byuda, at may tatlong anak ay pinaslang kahapon ng umaga sa harapan mismo ng bahay nito sa Brgy. Dalig, Sta. Rosa. Siya ay binaril sa batok at dibdib ng dalawang hindi pa nakikilalang salarin.
Bilang tagapagsalita ng Mamamayan Ng Sta.Rosa Para Sa Kagalingan, Kaunlaran, Kapayapaan Tungo sa Magandang Kinabukasan (MSRK3), si Carvajal ang siyang nagsilbing boses ng mga maralitang tagakomunidad sa nasabing bayan laban sa mga demolisyon. Naging aktibo rin ito sa kampanya laban sa korapsyon at anomalya sa local na pamahalaan.
“Si Mely ay isa lamang sa napakarami nang bilang ng mga lider kababaihan na pinaslang dahil lamang sa layunin nilang isulong ang kapakanan ng mamamayan. Kahit nakatanggap ito ng death threats dahil na rin sa aktibong paglaban nito sa demolisyon at anomalya sa Sta. Rosa ay hindi natakot na gampanan ang kanyang tungkulin bilang tagapagsalita ng mga maralita,” pahayag ni Emmi de Jesus, Secretary General ng GABRIELA.
“Nakakabahala ang mga sunod-sunod na pagpaslang sa mga local na lider, maging sa mga local na media na aktibong nagsasalita laban sa katiwalian at kabulastugan ng mga nasa local na pamahalaan. Hinahamon namin ang gobyernong Arroyo na magkaroon ng agarang paglutas sa mga kasong ito. Kung hindi mabibigyan ng agarang hustisya ang pagkamatay ni Mely, nangangahulugan lamang ito ng pagkunsinti ng pamahalaang Arroyo sa mga ganitong krimen upang takutin ang mamamayan na lumalaban para sa kanilang karapatan sa lupa at kabuhayan,” ayon kay de Jesus.
“Kasaysayan na rin ang makapagpapatunay na kahit anumang dahas o pananakot ang gawin sa mamamayan, mas marami pa rin ang tumitindig upang labanan ang kaapihan at karahasang kanilang nararanasan. Sa kagyat, nananawagan ang GABRIELA para sa mabilis na paglutas sa kaso upang papanagutin ang berdugong kriminal at kung sino man ang nasa likod nito sa brutal na pagpaslang kay Mely.”###
|
