|
Pahayag sa Pagpaslang kay Manalo
by Dennis Espada
Friday, Aug. 06, 2004 at 10:27 AM
dsword_2002@yahoo.com 09192400373 Calamba City
May kagyat na pangangailangang magbuklod ang lahat ng mga propesyunal sa midya sa buong Timog Katagalugan para aktibong maipagtanggol ang kanilang hanay laban sa tumitinding intimidasyon, panunupil at karahasan.
PRESS STATEMENT
Agosto 6, 2004
Mariing kinukondena ng National Union of Journalists of the Philippines (NUJP)-Laguna chapter ang brutal na pagpatay sa mamamahayag na si Arnel Manalo kahapon sa Bauan, Batangas.
Si Manalo ay correspondent ng dyaryong Bulgar at miyembro ng Operation Tulong ng DZRH (Manila Broadcasting Company). Mayroon din siyang kolum na pinamagatang "Pilantik ng Dila" sa Veritas, isang lokal na pahayagan. Kasapi rin siya ng Batangas News Writers Association.
Noong Hulyo 31, pinaslang ang brodkaster na si Roger Mariano ng DZJC sa Laoag, Ilocos Norte.
Sa loob lamang ng anim na araw, dalawang kasamahan natin sa midya ang pinatay nang walang kalaban-laban. Ang dumaraming bilang ng pamamaslang sa mga mamamahayag ay malinaw na isang malaking dagok sa press freedom.
Ikaapat na si Manalo sa bilang ng mga mamamahayag na pinatay ngayong 2004. Ika-54 naman siya sa mga pinaslang na Pilipinong mamamahayag mula noong 1986.
Nananawagan ang NUJP-Laguna sa mga awtoridad na imbestigahan ang kaso at kagyat na parusahan ang mga salarin.
Habang ipinagmamalaki ng gobyerno na may press freedom sa Pilipinas, ang mga taong seryosong nagtataguyod ng karapatan ng mamamayang malaman ang totoo ay binabaril at pinapatay.
Habang nabubuhay sa takot, kahirapan at katiwalian ang mga mamamahayag, mistulang isang ilusyon ang "press freedom."
Sa harap ng ganitong atake, may kagyat na pangangailangang magbuklod ang lahat ng mga propesyunal sa midya sa buong Timog Katagalugan para aktibong maipagtanggol ang kanilang hanay laban sa tumitinding intimidasyon, panunupil at karahasan. Dapat ding itaas ang kanilang antas ng propesyunalismo; pukawin ang sarili at ang sambayanan sa tunay nilang kalagayan sa lipunan. Nasa pagkakaisa natin ang lakas, nasa sama-samang pagkilos ang tagumpay.
Katarungan kay Arnel Manalo at sa lahat ng biktima!
Wakasan ang pamamaslang sa mga mamamahayag!
DENNIS ESPADA
Spokesperson,
National Union of Journalists of the Philippines-Laguna chapter
|
